لماذا تنتقد داعش ولا تذكر اسرائيل ؟

السؤال ده بحس انه مرتبط بالسؤال الفشيخ ( ليه مش بتنتقد الا الاسلام ) طبعا قبل كل شئ و منعا للمزايدات و الزياط انا طبعا ارفض  و احزن على الناس اللى بتموت فى فلسطين ولا ارضى عن الاستيطان و كل تلك التجاوزات و بغض النظر عن كون الشعب هناك ضحايا لقادتهم قبل ما يكونوا ضحايا لاسرائيل الا ان هناك اسباب عدة تجعلنى انا و غيرى اننا نعطى الاولوية فى النقد و التشريح للاصولية الاسلامية اكتر من الاصولية اليهودية او الصهيونية  

أولا : تاريخ الصهيونية او العنف من الجانب الاسرائيلى لو استعرضناه هنلاقى انه يتضائل من حيث الكم و النوع امام العنف و الارهاب الاسلامى !! اذ ان هذا العنف مقتصر على بقعة جغرافية محدودة من العالم و لمدى زمنى قصير اذا ما قارناه بالعنف الاسلامى المستهدف للعالم اجمع و لفترة امتدت ل 1400 سنة !! ... و فى عصرنا عندك داعش و القاعدة فى سوريا و العراق و غيرها .. عندك طالبان فى افغانستان و باكستان و بوكو حرام فى نيجريا و القاعدة فى الجزائر و اليمن و الحوثيين و حزب الله  و القائمة تطول  .. و عندك دول حلوة بتمول و ترعى الارهاب زى السعودية و ايران .

ثانيا : جوهر الحركة الصهيونية هى انشاء كيان يمثلهم فى بقعة جغرافية محدودة برضه .. انما الاصولية الاسلامية تستهدف العالم اجمع بمشروع الخلافة و غزو بلاد العالم و ارغام العالم على الخضوع لشريعتهم و معاييرهم و استهداف حريات و قيم الاخرين  ...

ثالثا : اسرائيل و الحركة الصهيونية و ان كانوا استخدموا الدين لتحقيق مصالح سياسية و تحويل الانتماء الدينى لقومية و انا ضد ده طبعا .. الا ان اسرائيل من الداخل تعتبر دولة  علمانية  فإسرائيل لا تحكمها تعاليم التوراة و لا التلمود المصدر الرئيسى للتشريع مثلا .. بل ان وضع المرأة و الاقليات فى اسرائيل  لا يقارن بدول الحكم الاسلامى الراشد زى السعودية و ايران و السودان الخ الخ ....

رابعا : بل حتى اسرائيل و من يطلق عليهم الصهاينة رغم كل شئ يبدون اكثر تسامحا و انسانية فى بعض المواقف اذا قارناهم بالعقلية الاسلامية عموما !! مثلا مستشفيات فى اسرائيل استقبلت مصابين من سوريا و من فلسطين ... هل فيه مستشفى واحدة او دولة اسلامية واحدة ممكن تستقبل او تعالج اسرائيليين ؟؟!! عمرى مثلا ما شفت فيديوهات اسرائيلية بيتفاخروا فيها  ان لاعب من عندهم فى بطولة رياضية رفض ان يصافح لاعب عربى او مسلم او ان عملوا اغنية بيقولوا فيها بنكره العرب او بنكره المسلمين مثلا او انهم عملوا برامج مقالب للمشاهير يتباروا و يستسابقوا فيها لاظهار العداء و العنصرية تجاه العرب و المسلمين على غرار ما يحدث فى اعلامنا الجميل اوى  .

خامسا : عمرى ما شفت فيديوهات اسرائيليين بيدبحوا اسرائيليين او اسرائيليين بيفجروا اسرائيليين او اسرائيلى مدنى بيقتل رسام كاريكاتير او بيخطف ناس جوة كافيتريا فى بلاد ما وراء البحار  الخ الخ بل ان اغلب ضحايا العنف الاسلامى هم من المسلمين انفسهم !! .. فلم يسلم منهم احد لا غير المسلمين ولا حتى المسلمين !!

سادسا : اعتقد ان الخسائر و الضحايا اللى بتتقتل على ايدهم  كل يوم فى بلدان مختلفة  اكتر بكتير من اللى ماتوا بسبب اسرائيل ..

سابعا : و ده الاهم الصهاينة مش هما اللى بيكفرونا هنا و يهدروا دمنا ولا هما اللى بيحرمونا من حقوقنا المدنية هنا او بيعتبرونا مواطنين درجة تانية ولا هما اللى حاطين لى فى بطاقتى دين انا مش مؤمن بيه و بيرغمونى عليه  ... اصدقائنا اللى اتسجنوا بتهم ازدراء الاديان و اللى اتضربوا و اتعرضوا لمحاولات قتل مكنش على يد الصهاينة ولا نصرة للشريعة اليهودية ... الصهاينة مش هما اللى احتلوا بلدى من 1400 سنة و نشروا دينهم و فرضوا لغتهم هنا بالقوة و ذلوا استعبدوا الناس ولا هما اللى حرقوا كنايس المسيحيين ولا قتلوا الشيعة ولا هما اللى قتلوا السادات ولا فرج فودة ولا هما اللى عايزين يوصلوا لحكم الله و لو على جماجمنا ولا هما اللى بياثروا فى حياتنا و محاصرينها من كل جانب فاقولها و بصراحة حاليا انا مشكلتى مش مع اسرائيل ولا مع الصهيونية دلوقتى .. و عموما لما نبقوا  بلد علمانى و ديموقراطى بجد نبقوا نتكلموا عن اسرائيل و نشوفوا بتعمل ايه .. اللى بتقوم حريقة فى بيته بيطفى بيته الاول مش بيروح لبيت الجيران .. و بالمناسبة محدش يكلمنى عن مؤامرات عشان  هقوله كلمة وحشة J