تبرير القتل بالقتل و التحرش بالتحرش ! :

على طريقة الاسلاميين فى تبرير  القتل و الدبح و الحرق بأن امريكا ضربت اليابان بالنووى و قتلوا الهنود الحمر ! فلا باس اننا نقتلوا احنا كمان! فوجئت ببعض الناس تنشر و تشير مثلا خبر عن تقرير حكومى فى عاصمة اوروبية ان 100 % من النساء فى ( العاصمة )  تعرضن لتحرش لفظى او بصرى او جسدى فى المواصلات العامة ! طبعا بغض النظر عن ما يعتبرونه تحرش هناك ان حتى فيه ( تحرش بصرى ! ) و عن ان الحكومة هناك اتحركت لاتخاذ اجراءات و محدش قال البنات هى السبب ولا لبسهم ! و بغض النظر ان الموضوع ظاهرة  فى مكان محدد مش واخدة شكل الوباء  فى الشوارع و الميادين زى عندنا ولا شوفنا بنات بيتحرش بيها جماعيا و تتقطع ملابسها بالكامل فى الميادين العامة وسط حضور الاف البشر ! ولا شوفنا فضيحة التحرش بصحفية بتغطى احداث الثورة و محاولة اغتصابها فى ميدان عام ! ولا شوفنا الشرطة هناك مثلا بتنزل قوات عشان تأمن دور السينما و الاماكن العامة لحماية البنات من قطعان المتحرشين اللى بينطلقوا فى الشوارع بكثافة فى الاعياد . و بغض النظر عن التقارير اللى بتتكلم عن التحرش فى مصر عموما مش فى المواصلات بس ! ولا مدينة معينة بس و ان اكتر من  90 فى المية ( يقال فى بعض المواقع 99 % )  من النساء فى مصر ضحايا للتحرش و مش اى تحرش !! انا شفت بنفسى الامر وصل ان ست فلاحة على ايدها طفل تم التحرش بها فى المترو ! قدام الناس كلها ! فلو قعدنا نعدد و نتكلم عن اشكال التحرش و زيادة معدلاته فى مصر و الحوادث اللى شفتها بنفسى مش هخلص . الخلاصة ان وجه الاحتجاج بما يحدث فى بلاد تانية مالوش معنى فالتحرش ظاهرة موجودة فى الدنيا كلها فوجود تحرش فى بلاد زى دى و وجود تحرش عندك انت كمان لا يعنى الا شئ واحد و هو خلل فى سلوكيات الذكور فى المجتمع البشرى عموما ولا يمكن اننا نلوم الضحية باى شكل من الاشكال او نبالغ فى وضع قيود و قماش اكتر على الضحية بحجة حمايتها  و لارضاء  الاخ حارس الفضيلة المتحرش فنحن فى مصر لم نرى زيادة فى التحرش الا مع زيادة تلك القيود و ذلك القماش  ! ... مفيش دول و مجتمعات مثالية لكن هناك مجتمعات متقدمة عن الاخرى فرق كبير بين اللى يواجه مشاكله و يحاول يحلها و بين اللى بيبرر خيبته بخيبة غيره بدل ما يقارن نفسه بالاحسن ! بالظبط زى التلميذ اللى يجيب ملحق و لما ابوه يلومه يقول طب ما فلان هو كمان جاب ملحق !  المطلوب مش تغيير ملابس المطلوب تغيير للعقول .