الكاسيات العاريات!!

الصورة  تدل على سطحية كاتبها و تقل دم مبالغ فيه  غير انه حكاك و لكن لو سألت هذا الشخص و كثير من المسلمين ليه اللى تلبس كده فى نظرك مش محترمة هيقولك عشان حرام تلبس كده تسأله طب و عرفت منين ان ده حرام ؟ فلو قرا او سمع لشيوخ على طول هيتحفك بحديث الكاسيات العاريات المشهور و يخبطك بالتفسير على طول ان كاسيات عاريات تعنى مغطية حتة و معرية حتة او لابسة ضيق ! او لابسة كأنها مش لابسة و بالتالى فاللى فى الصورة ده حرام و الفستان حرام و الجينز حرام و المايوه حرام الخ و اللى تعمل كده داخلة النار الحديث بلفظه الكامل بيقول : (صِنْفَان مِنْ أَهْلِ النَّارِ لَمْ أَرَهُمَا: قَوْمٌ مَعَهُمْ سِيَاطٌ كَأَذْنَابِ الْبَقَرِ يَضْرِبُونَ بِهَا النَّاسَ. وَنِسَاءٌ كَاسِيَاتٌ عَارِيَاتٌ مُمِيلَاتٌ مَائِلَاتٌ، رُؤُوسُهُنَّ كَأَسْنِمَةِ الْبُخْتِ الْمَائِلَةِ. لَا يَدْخُلْنَ الْجَنَّةَ وَلَا يَجِدْنَ رِيحَهَا، وَإِنَّ رِيحَهَا لَيُوجَدُ مِنْ مَسِيرَةِ كَذَا وَكَذَا) طبعا الحديث بيتكلم عن رجال معهم سياط و بيضربوا بيها الناس فبينفضوا طبعا للجزئية دى ولا بيجيبوا سيرتها المهم طبعا الحتة بتاعة النساء عشان نبيض عليهم و نقرفوهم و لكن نلاحظ ان الفاظ الحديث مبهمة جدا و غير محددة و ممكن تتفهم بطرق كتير يعنى ايه مثلا كاسيات عاريات مش ممكن يكون معناها ان منهن الكاسيات و منهن العاريات لأنه ما قالش لبس ضيق او كاشفة حتة و مغطية حتة و يعنى ايه مائلات مميلات ! مش واضح طبعا و ما هو سبب عدم دخولهن الجنة هل هو بسبب انهن كاسيات عاريات ولا عشان مائلات مميلات ولا عشان رؤوسهن كأسنمة البخت ( الجمال يعنى ) ولا بسبب انهم جمعوا كل ذلك فى نفس الوقت ؟ مش واضح و نص الحديث مبهم جدا و غامض و كعادة النصوص الاسلامية و الدينية عموما تلاقى نص مبهم غير مفهوم و يتركك طبعا مع غابة من التفسيرات و الكلام المتضارب مثلا احد الائمة القدامى فسر رؤسهن كأسنمة البخت بأن دول النساء اللى بتلبس عمائم !! و احتج بيه على تحريم العمائم على النساء اما المعاصرين ففسروا نفس الكلمة بأنها التسريحات النسائية المعاصرة !! و طبعا هجوم ضارى على غير المحجبات طبعا ده بالنسبة لمتن او نص الحديث هل قال لبس ضيق ؟ هل قال جينز ؟ هل قال فستان ؟ هل وضح او حط معايير او مواصفات كاسيات عاريات بأى كيفية ؟؟ طبعا نهائى مفيش الكلام ده بس طبعا بسبب كلمة غامضة و مبهمة لازم تتحرم المرأة من ابسط حقوقها فى انها تختار ما تلبسه .. ده بالنسبة لمتن او نص الحديث نيجى بقا للسند ! الحديث ذكر فى مسند احمد و صحيح مسلم و لكن  هل الحديث ده هل مؤكد نسبته الى النبى ولا مختلف فى نسبته و رفعه للنبى ؟ الحقيقة ان الحديث رواه ابو هريرة و اهل الحديث اختلفوا فى رفعه الى النبى او وقفه على ابو هريرة !!! يعنى مختلفين اذا كان ده كلام النبى ولا كلام ابو هريرة فعند البحث فى السند هتلاقى مسلم رفعه للنبى فى الوقت اللى وقفه الموطأ على ابو هريرة ! قال ابن الأثير في جامع الأصول (8359): ((إلاَّ أنَّ الموطَّأ وقفه على أبي هريرة، ومسلماً رفعه إلى النبي)). و كوبى تانى عن الدار قطنى يقول : ((وَوَقَفَه أصحابُ الموطَّأ، وهو المحفوظ)) و اللى عايز يبحث اكتر يدخل ملتقى اهل الحديث و يشوف بنفسه و هكذا احبتى فى الله هذا هو اهم ادلتهم و عمدتهم فى تدخلهم فى شئون الغير و تصنيف الناس حسب الزى و المظهر و لكم ان تحكموا !