المظهر و الملابس و الرقص و العهر و العاهرين ! :

طبعا مش عايز اناقش مصطلح العهر و تعريف العهر و مشتقاته و مدى التعسف و العشوائية فى استخدام المصطلح و ربطه بحاجات كتير حسب المزاج طبعا فإظهار المرأة لجمالها عهر الرقص الشرقى عهر خلع الحجاب عهر بل يصل الامر عند بعضهم ان وضع العطور او اظهار المنقبة لعيونها نوع من العهر و كأن من تقوم بأى من ذلك فهى ساقطة انا مش هجادلهم فى اى من ده و هفترض معاهم الافتراض الاسوأ ان اللى بتقوم بأى حاجة من الحاجات دى هى فعلا بتقوم بإستعراض بانوثتها ! فهل النوع ده من الاستعراض مقتصر على الاناث ؟؟ بالمناسبة اعتقد ان حتى فى الحيوانات منتشر بين الذكور اكتر ... المهم ليه مثلا بتعتبروا الراقصة غير شريفة و ساقطة و منحطة اخلاقيا فى حين مثلا بتعتبروا لاعب كمال الاجسام مجرد رياضى رغم انه بيتعرى اكتر من الراقصة و بيطلع على المسرح ينافس غيره فى الاستعراض بجسمه و باوضاع مختلفة و شبه من غير هدوم ! ( سبيدو او شئ بسيط ) اليست نظرة المرأة لجسم الرجل هى نظرة الرجل لجسم المرأة ولا ايه ! ؟ فلو سميت دى رياضة و الراجل اللى بيعمل كده رياضى فليه مش بتسمى الراقصة فنانة و الرقص الشرقى فن ؟! اليس كل منهم استعراض ! و من ده كتير من الانشطة . ليه بتسمى استخدام الموديلزالبنات  فى الاعلانات استغلال للمرأة و نوع من التجارة بيها للترويج و الدعاية و بلا بلا و مش بتعتبر استخدام شركات الدعاية لموديلز رجال من اجل الترويج لمنتجاتها استغلال و بضاعة جنسية و عهر و بلا بلا  ... ليه البنت اللى بتظهر جمالها تبقى عاهرة و بتدعوا الرجال اليها و الراجل اللى يلبس تى شيرت عشان يظهر جسمه و يبين انه رياضى مثلا مش عاهر !؟ بل انت لما تحلق دقنك و او تروح للحلاق يظبطك اسأل نفسك ليه بتعمل كده ؟؟! لما بتروح تجيب هدوم و عايز يبقى شكلك كويس ليه ؟؟! اهتمامك بمظهرك اصلا او لما تحط بيرفيوم ليه ؟؟ ليه بتعمل كده ! ما هو انت بتعمل كده عشان يبقى شكلك كويس قدام الناس و غالبا يا بتعمل كده عشان يبقى شكلك حلو قدام البنات و الستات و لو قلت لأ يبقى انت مثلى و بتعمل كده عشان يبقى شكلك حلو قدام الرجالة !! و ماتقوليش انك بتعمل كده لنفسك . و لو قلت لى انك بتعمل كده لنفسك فهى كمان بتعمل كده لنفسها اشمعنى انت يعنى  ! فالموضوع كله اصلا هو الشعور السائد و الفكر العجيب اللى بيعتبر اظهار الذكورة فخر و شئ يثير الاعجاب بينما اظهار الانوثة عار و عهر و تجارة جسد الخ الخ ..الخلاصة ان الراقصة انسانة و البنت اللى بتهتم بمظهرها و جمالها انسانة و المنقبة اللى بتظهر عيونها انسانة و  البنت اللى بتقلع الحجاب انسانة و المحجبة اللى بتحط ميكب انسانة و الموديل اللى بتطلع فى الاعلانات انسانة فإن اعتبرتهن عاهرات فأفتكر و انت بتسرح شعرك او بتحدد دقنك انك عاهر ايضا !!! و بنفس مقياسك !